Fair goddes, loadstar of delight,
Natours triumph and beuties lyfe,
Earth's ornament, my hopes full hight,
My only peace, and pleasing stryfe,
Let mercie mollifie thy mynd!
A Saturnes hert sould Venus have?
Or sould thou prove to him wnkynd
Quho humbly lyfe of the doth crave?
Since all thy pairts sum special grace
Decoris, to schau thy heavinly race,
Vertue thy mynd and love thy face,
Proportioune brave thy featour:
Pitty then must neids haue place
In such a diuin creatour,
Exceids the bounds of Natour.
Quhen first thoise angel's eyes I vieued --
Tuo sparks t'inflame a world of love --
My fatal thraldome then ensured;
Then did my liberty remove.
Thair first infected was my mynd;
Loves nectared poysoune thair I drank;
Thy sacred countenance so schyn'd
So far above all humane rank.
Let then thoise eyes quhich did insnair,
Those schyning stares, thair fault repair,
Dispersing by thair beimes preclair
The clouds of thy disdaining.
Wisdome, vertue, beutie rair,
In the have all remaining:
Of rigour be thy staining.
Sould crueltie, sueit love, ecclips
The sunschyne of those glorious rayes?
Or sould thoise lovely smyling lips
Breath foorth affectiounes delayes?
Let mercie countervaill thy worth,
And measour pitty by my paine;
Sua, thy perfectiounes to paint foorth
Ane endles labour sall remaine.
Lat beuties beames then thau away,
Reflecting only on ws tuay,
The ycinesse of loves delay,
And melt disdaines cold treassour.
Natours due so sall we pay,
Baithing in boundles pleassour,
Quhose sueits exceid all meassour.