Be glaid, al ȝe that luvaris bene,
For now hes May depaynt with grene
The hillis, valis and the medis,
And flouris lustely upspreidis:
Awalk out of ȝour sluggairdy
To heir the birdis melody,
Quhois suggourit nottis loud and cleir
Is now ane parradice to heir.
Go walk upoun sum rever fair,
Go tak the fresch and holsum air,
Go luke upoun the flurist fell,
flurist: floweredfell: rocky hill
Go feill the herbis plesand smell,
Quhilk will ȝour comfort gar incres
And all avoyd ȝour havines:
The new cled purpour hevin aspy,
Behald the lark now in the sky,
With besy wyng scho clymis on hicht
For grit joy of the dayis licht.
Behald the verdour fresch of hew,
Powdderit with grene, quhyt and blew,
Quhairwith Dame Flora in this May
Dois richely all the feild array,
And how Aurora with visage pale
Inbalmes with hir cristall hale
The grene and tendir pylis ȝing
Of every gress that dois upspryng,
And with hir beriall droppis bricht
Makis the gresys gleme of licht.
Luk on the saufir firmament,
And on the annammellit orient:
Luke or Phebus put up his heid,
As he dois rais his baneris reid
He dois the eist so bricht attyre
That all semis birnyng in a fyre,
Quhilk comfort dois to every thing,
Man, bird, beist and flurissing.
Quhairfoir, luvaris, be glaid and lycht,
For schort is ȝour havy nycht
And lenthit is ȝour myrry day:
Thairfoir ȝe velcum new this May,
And, birdis, do your haill plesance
With merry song and observance
This May to velcum at your mycht
At fresch Phebus uprysing bricht,
And all ȝe flouris that dois spreid,
Lay furth ȝour levis upoun breid
And welcum May with benyng cheir,
The quene of every moneth cleir,
And everry man, thank in his mynd
The god of natur and of kynd,
Quhilk ordanit all for our behufe:
The erd undir, the air abufe,
Bird, beist, flour, tyme day and nycht,
The planeitis for to gif ws licht.
